11 : திரை விமர்சனம் - உயிர்

நடிகர்கள் - ஸ்ரீகாந்த்
நடிகைகள் - சங்கீதா(ரசிகா), சம்வ்ருதா (என்ன பொருளோ?)
இயக்குனர் - சுவாமிநாதன்
இசை - ஜோஷுவா ஸ்ரீதர்

கொழுந்தன் மீது ஆசைப்படும் அண்ணி என்ற ஒரு வரிக் கதைதான் கரு. இயக்குனர் கூற்றுப்படி இது அவர் ஊர்ப்பக்கத்தில் நடந்த உண்மைச்சம்பவத்தை அடிப்படையாக கொண்டதாம்!

பார்க்கும் போது பெரும் கலாச்சார அதிர்வையெல்லாம் ஏற்படுத்தவில்லை, ஆனால் இணையத்திலும் மற்றும் ஊடகங்களிலும் விமர்சனங்களை படித்தால் மற்றொரு குஷ்பு சமாச்சாரம் புகைக்கப் பட்டிருக்கிறது. உதாரணத்திற்கு ஒன்று, சரி நமக்கெதற்கு அரசியல்... படத்திற்கு வருவோம்!

ஸ்ரீகாந்த்துக்கு 'கனா கண்டேன்' போலொரு நிறைவான கதாபாத்திரம், ஆனால் உணர்ச்சிகளை வெளிக்காட்டுவதிலும் அதே பாணி!

சம்வ்ருதா...குடும்பப் பாங்கான கதாபாத்திரங்களை இன்னும் கொஞ்ச காலத்திற்கு நிரப்ப வந்திருக்கும் அழகான புதுவரவு. பாடல்களில் இன்னும் கொஞ்சம் உற்சாகம் காட்டியிருக்கலாம், எனினும் தன் பங்கை நிறைவு செய்திருக்கிறார், தன்னளவில்.

சங்கீதா, பாத்திரத்தேர்வு மிகச் சரி என்று நிரூபித்திருக்கிறார். வெறும் கண்களாலும், எல்லை தாண்டாத கவர்ச்சியிலுமே தன் பாத்திரத்திற்கு மெருகேற்றியிருக்கிறார். எவ்வளவோ வாய்ப்புகள் படம் நெடுக இருந்தும் எல்லை மீறாததற்காகவே இயக்குனருக்கு ஒரு சபாஷ்! (சற்றே கண்ணெரிச்சல் மற்றும் வயிற்றெரிச்சலுடன்)

சம்வ்ருதா மற்றும் ஸ்ரீகாந்த் கான்வெண்ட் பள்ளியில் அக்குழந்தைகள் அறிமுகப்படுத்தி வைக்கும் காட்சியில் வசனகர்த்தாவுக்கு கற்பனை வறட்சி, அதை விஞ்சி நிற்கிறது "கான்வெண்ட் சொல்லித்தரும்... " என்று ஆரம்பிக்கும் பாடல்.

இசை, ஸ்ரீகாந்த் அண்ணன், மற்றும் அந்த நண்பர் குழு இட்டு நிரப்பும் வேலையை மட்டுமே செய்கிறது.

அண்ணன் கதாபாத்திரத்தின் தற்கொலையாலும், தன் மகளின் மேல் வேண்டுமென்றே பால் கொட்டும் காட்சி-கதையமைப்பிலும், 'நான் செத்திருந்தால், என் தங்கச்சிய உங்கண்ணனுக்கு கட்டி வெச்சிருப்பாங்கல்ல' என்ற கேள்வி ஏற்படுத்த வேண்டிய பாதிப்பு சுத்தமாக இல்லாது போய்விடுகிறது. இந்த வசனத்திற்கு அட ஆமாம்ல என்று உறுத்தல் இல்லாமல் சொல்ல முடிவதில் தெரிந்து விடுகிறது நம் சமூக அமைப்பின் 'வள்ளல்'. ஸ்ரீகாந்த் அண்ணன் இயற்கையாக இறந்திருந்து, சங்கீதா இன்னும் பாசமிக்க தாயாகவும் இருந்திருப்பின் அக்கேள்வியின் தாக்கம் முழுமை பெற்றிருக்கலாம்.

குறைந்த பட்சம், "நீ நீயா இருந்திருந்தின்னா பிரச்னையே இல்லைய்யா...நம்ம காதலிக்கும்போது இத அத சொல்லி என்னை ஏமாத்திட்டியே..." என்ற ரீதியில் சங்கீதா பேசும் வசனத்திற்கு பதில் அதை இன்னும் விரிவாக காட்சிப் படுத்தியிருக்கலாம்

இன்னும் கொஞ்சம் சிரத்தையெடுத்து, நடுநிலை வழுவாமல், தனி மனித உணர்ச்சிகள் மற்றும் உறவுமுறைகளூடான சிக்கல்களை பிம்பப்படுத்தியிருந்தால் ஊடகங்களில் இதையொற்றிய ஆரோக்கியமான விவாதமொன்றை இப்படமே துவங்கி வைத்திருக்கும்.

மொத்தத்தில், நம் சமூக அமைப்பின் உறுதூண்களாக விளங்கும் உறவுமுறைகளுக்கெதிராக, தனி மனித உணர்ச்சிகள் எழுப்பும் கேள்வியே உயிர். கலாச்சாரக் காவலர்கள் அஞ்சும் விளைவுகள் இந்த படத்தை பார்ப்பதால் மட்டுமே நேர்ந்து விடாதென்றே நினைக்கின்றேன்!