43 : எனக்கும் வேண்டாம் தேன்கூடு தரும் பரிசு! (?)

இந்த முறை மைக் செட்டெல்லாம் வைக்கவில்லை, மூன்று-நான்கு பதிவுகள் ஒரே படைப்பைப் பற்றி பேசி கழுத்தறுக்கவில்லை ஆனாலும் மிகமிக அதிகப் படியாக 62 ஓட்டுக்கள் விழுந்திருக்கின்றன. கிள்ளிப் பார்த்து வலித்த போதும் கூட நம்ப முடியாமல்தான் இருக்கிறது.

இது உண்மையில் வெற்றியா? என யோசிப்பவர்களுடனும் மற்றவர்களுடனும் நான் திட்டமிட்டு செய்த தகிடுதத்தங்களையும், திட்டமிடாமலே அடித்த அதிர்ஷ்டத்தையும் பகிர்ந்து கொள்கிறேன்.

* ஒரே கதை, அதை நீளம் என்று சாக்குச் சொல்லி 5-ஆக பிரித்தளித்திருந்தேன். அவற்றை தனித்தனியாகவே தேன்கூட்டில் சமர்ப்பித்திருந்தேன். அதிகம் பேரை ஈர்க்க என்று செய்த சின்ன சித்து விளையாட்டு அது.

*** அது ஐந்து வெவ்வேறு கதைகளாக புரிந்து கொள்ளப்பட்டது தனி துன்பியல் நிகழ்வு :-(

*** மேலும் வாக்களிக்கும் சமயத்தில்தான் ஓட்டுகள் பிரியும் அபாயத்தை உணர்ந்தேன், தேன்கூடு நிர்வாகிகள் தந்த ஆலோசனையால் அது ஒரே பதிவாக வாக்குக்காக வைக்கப்பட்டது, என் அதிர்ஷ்டமே. நிறைய ஓட்டுக்களுக்கு மிக முக்கிய காரணியாக இதை கருதுகிறேன்.

* உலகத்திலேயே அதி சுவாரசியமானது காதல் அதுவும் அடுத்தவனது காதல் என்ற உண்மையை மனதில் வைத்து காதல் ரசத்துடன் இரண்டு அத்தியாயங்களை இடையில் சொருகியிருந்தேன் - கதைக்கு தேவைப்படா விட்டாலும்

*** தனிப்பட்ட முறையில் என் நண்பியிடம் வாங்கிக் கட்டிக் கொண்டேன்

* வளைகாப்பு விருந்து பற்றிய பதிவில் திட்டமிட்டே போட்டிக்கான என் படைப்பை சுட்டியிருந்தேன். மேலும், பதிவின் தலைப்பு, இட்லி வடையும் போளியும். இட்லிவடை மற்றும் போலி மிக அதிகம் பேரை ஈர்க்கும் வார்த்தைகள் என்பதால் அந்த சதி.

*** நான் எதிர்பார்த்திருந்த வருகை எண்ணிக்கையோ, பின்னூட்டங்களோ இல்லாது போய் என் மூக்கறுத்தது வேறு விஷயம்!

*** சில தினங்கள்(5) முன்கூட்டியே செய்த பதிவென்பதால் ஓட்டுக்களை அது பெற்றுத்தந்திருக்காது என்பதுவும் என் எண்ணம்.

* என் கல்லூரியில் நடந்த பல நிகழ்ச்சிகளின் தொகுப்பே கதையென்பதால் என் கல்லூரி நண்பர்கள்(10-15 பேர்) அனைவருக்கும் இப்படைப்பை பார்க்க சிபாரிசித்திருந்தேன். கதையின் பின்புலத்தை அவர்கள் அறிந்திருந்ததால் அனைவருமே ரசித்தனர்,. தேன்கூட்டில் எப்படி வாக்களிக்க வேண்டும் என்று நான் ஏற்கனவே பதிவிட்டிருந்ததையும் அவர்களுக்கு தெரியப் படுத்தியிருந்தேன்.

*** ஆனால் எத்தனை பேர் நேரத்தில் படித்திருப்பார்கள், அவற்றில் எத்தனை ஓட்டாக மாறியிருக்கும் என்பதை உங்களின் ஊகத்திற்கே விட்டு விடுகிறேன்.

*** ஏனெனில் தங்கள் மடல் முகவரிகளை பதிந்து கொண்டு, அவற்றிற்கு உயிரூட்டி பின் வாக்களிப்பது என்பது நிச்சயம் சில மணித்துளிகளை எதிர்பார்க்கும் விடயங்களே. இந்தக் கதை அவர்களுக்கு பிடித்திருக்காத பட்சத்தில் அதை செய்ய வேண்டிய அவசியமும் அவர்களுக்கில்லை.

*** மற்ற கதைகளை படித்திருக்க மாட்டார்கள் என்ற ஒரு குறை அந்த ஓட்டுக்களை, கள்ள ஓட்டுக்களாக மாற்றுமா என்ற கேள்வியை உங்களிடமே கேட்டு வைக்கிறேன்.

* பின்னூட்டங்களில்லாவிடினும்...இன்னும் இருக்கிறது ஆகாயம், என்ற பதிவும் அதில் செந்தழல்ரவி உபயத்தில் எதிர்பாராமல் நடந்த கும்மியும் என் வலைப்பூவுக்கு நிறைய பேரை வர வைத்திருக்கலாம், அது ஒரு காரணியாகவும் இருந்திருக்கலாம், ஏனென்றால் சம்பவம் ஆரம்பித்த தினம் செப். 20, 2006.

என் படைப்பை நிஜமாகவே படித்து ஓட்டுப்போட்ட அனைவருக்கும் என் நன்றிகள்! உள்ளபடியே மிகப் பெருமையுடன், தேன்கூடு தந்த பதக்கத்தை என் சட்டையில் குத்திக்கொள்கிறேன்.

போட்டி நடத்திய தேன்கூடு-தமிழோவியம், மற்றும் இந்த வித்தியாசமான தலைப்பைக் கொடுத்து போட்டியை சுவாரசியப் படுத்திய கொங்கு ராசு, நடுவர்கள் நிலா, ராசு மற்றும் KVR அனைவருக்கும் என் நன்றிகள்.

சொல்லி அடித்த ஆசாத், யோசிக்க வைக்கும் யோசிப்பவருக்கும், நல்ல படைப்புகளால் மிரட்டும் முரட்டுக்காளைக்கும் வெற்றி பெற்றதற்காக வாழ்த்துக்கள். கலந்து கொண்ட அனைவருக்கும் சிறப்பு வாழ்த்துக்கள்.

அப்புறம் எல்லோருக்கும் ஒரு சின்ன வேண்டுகோள், இதுபோன்ற சிறு மனக்கிலேசங்களால் எழுதுவதையோ, போட்டிக்கு அனுப்புவதையோ தயவுசெய்து நிறுத்திவிடாதீர்கள்.

என் மன உணர்வுகளையும், வாழ்வின் நிகழ்வுகளையும் எழுத்தில் வடிக்க இயலும் என்ற நம்பிக்கையை எனக்கு தந்ததற்காகவும் அனைவருக்கும் மேலும் ஒரு சிறப்பு நன்றி!

ம்... எல்லாம் சரி அப்புறம் ஏன் தலைப்பு இப்படி...

பின்ன என்னங்க பின்ன, இங்கயே எழுத சரக்கு ஒண்ணுமில்லாமதானே இத்தன கூத்து பண்ணிக்கிட்டு இருக்கோம்; இதுல பரிசு என்னடான்னா? தமிழோவியத்திலும் எழுதணுமாம்!

மேலும் ஜீன்ஸ் அணிவதல்ல இன்றைய ஃபாஷன்!