06 : கழுகுமலைக் கள்ளன்

நான் பொறந்த ஊருங்க கழுகுமலை. அங்கல்லாம் போயி ஒரு ஆறேழு வருஷமாச்சு, அதுக்காக மறந்துருவமா என்ன... பொறந்த ஊர மறக்ற வம்சமா நானு இல்ல மறக்றா மாதிரி ஊரா அது!

அதுனாலதான் பாருங்க நேத்து வலை மேஞ்சுகிட்டு இருந்தப்போ இங்க வந்ததும் கை?! தானா நின்னுருச்சு. அதுவும் அவரோட ஒளிக்கோப்ப தட்டினா மனசு அப்டியே, BSA SLR மிதிவண்டிய மிதிச்சுகிட்டு ஞாபகம் வருதே பாடப் போயிருச்சு. பனங்காட்டு பூமிதான்னாலும் பசேர்னு கெடக்கும். சின்ன ஊர்தான் ஆனா அம்புட்டு அம்சா இருக்கும். ஊருக்கு நடுவால இருக்றதுக்கு பேர்தான் கழுகுமலை. மலைய ஒட்னாப்புல ஏகப்பட்ட கொளம் குட்ட அத சுத்தி ஊரு... அப்றம் ஊர சுத்தி மறுபடியும் மலைங்க மலைய சுத்தி மறுபடியும் கொளம் குட்டன்னு... வட்டத்துக்குள்ள வட்டம், கட்டத்துக்குள்ள கட்டம்-னு ஊரே ஒரு அமைப்பா இருக்கும்.

சித்திர, வைகாசி நல்ல வேனக்காலம் அப்பயும் அப்றம் கோடை முடிஞ்சதும் பதனீர் கிடைக்கும் பாருங்க... அதோட சுவைக்கு ஈடு இணையே கிடையாது. ஆனி, ஆடி... அடடா இப்பத்தானுங்க சீசன்! ஐயோ இப்ப மட்டும் ஊர்ல இருக்கனும், காலங்காத்தாலே எந்திரிச்சு ஒரு பெரிய தூக்குவாளிய சைக்கிள்ள மாட்டி ஒரு மிதி மிதிச்சா, வடவால இருக்ற பனங்காட்டுக்கு போயிரலாம். பனமட்டைய குவிச்சு, கொஞ்சம் குழி நுங்கையும் தோண்டி போட்டு அதுல ஒரு படி பதினிய ஊத்த ஊத்த அடிச்சமுன்னு வைங்க... மத்தியானம் வரைக்கும் சும்மா திம்முனு இருக்கும். வீட்ல இருக்றவங்களுக்கு தூக்குவாளில எடுத்துகிட்டு போறதுலயும் நமக்கு பங்கு கிடைக்கும். ஹூம் அது ஒரு வசந்த காலம்.

மகரந்தச் சேர்க்கை நடந்ததுல இன்னோரு கழுகுமலைப் பூ பூத்திருந்திருக்கிறது, அதையும் ஜான் போஸ்கோ கண்டுபுடிச்சு எழுதியிருந்தாரு. அதுல இருந்த தெப்பக்குளம் பல தேவதைக் கதைகளை ஞாபப்படுத்திருச்சு, அப்றம் எங்க தூங்க. அந்த தெப்பக்குளத்துல கிழக்கு தெச பார்த்தா மாதிரி ஒரு பசு தல (சிலைதான்) இருக்கும். நல்ல மழைக்காலத்தில் எங்கெங்கயோ கம்மாவெல்லாம் நெறஞ்சு பசுவாய்ல தண்ணிவரும் அத பாக்றதுக்கு வரும் பாருங்க கூட்டம்... மேல இருக்ற படத்துல தெரியற கல் சுவர்ல உக்காந்துகிட்டு நானும் பாலாஜி-னு நம்ம பால்ய சினேகிதன் ஒருத்தனும் உக்காந்து மணிக்கணக்கா அரட்டையடிக்றது. என்னது... எதுக்குன்னு உங்களுக்கு தெரியுமா... தெப்பக்குளத்துல தண்ணியெடுக்க வர்ற பொண்ணுங்கள நாங்க சைட் அடிப்பமா... சேச்சே நாங்கெல்லாம் நல்ல பசங்க... அப்டியெல்லாம் செஞ்சா சாமி கண்ண குத்திரும்னு எங்க பாட்டி சொல்லிதானே அனுப்பி விடுவாங்க ;)

வளவளன்னு இழுக்காம... மலையடிவாரத்துல இருக்ற முருகன் கோவில், அரைமலையில் இருக்கும் சமணர் பள்ளி, இரண்டுக்கும் இடையில் இருக்கும் சுரங்கப்பாதை, மலையுச்சி பிள்ளையார் கோவில், கழுகுமலை தேர் திருவிழா, சஷ்டி விரதம்... அது முடிஞ்சதும் வர்ற சூரசம்ஹாரம், இருக்ற-இருந்த ரெண்டு டூரிங் டாக்கீஸ், தெப்பத்துக்குள்ள இருக்ற யானைக் கவுணி, கோயில் தெருவுல இருக்ற அரண்மனை, அதுக்கு பின்னாடி இருக்ற தெருவுல படிச்ச ஹிந்தி டியூசன், பக்கத்தில இருந்த ஐஸ் கம்பெனி, மலைக்கு பின்னாடி இருக்ற 'பிரதர் ஸ்கூல்' எல்லாம் பத்தி அப்பப்ப எழுதுறேன்

அடுத்த பதிவில் எதிர்பாருங்கள் வெட்டுவான் கோவில் பற்றி வாழ்ந்துவரும் ஒரு செவிவழிக்கதை.

இப்போதைக்கு வ்வ்வ்வர்ர்ட்ட்டா....