49 : என் வாழ்க்கை... நான் கொடுத்த விலை

உன் தாய் தந்தையிடமிருந்து பேச்சு நடைகளைக் கற்றுக் கொள்கிறாய், ஆசிரியர்களிடமிருந்து எதைப் பேசுவது எப்படி நடந்து கொள்வது என்பதைக் கற்றுக் கொள்கிறாய், புத்தகங்களிடமிருந்துதான் உனக்கு சிறகுகளும் இருப்பதை உணர்ந்து கொள்கிறாய் என்று யாரோ சொன்னது உண்மைதான் என்று ஒப்புக்கொண்ட தினத்தில் நான் "One" என்ற புத்தகத்தை படித்து முடித்திருந்தேன்.

மேலே படத்தில் உள்ள ரிச்சர்ட் பாக்(Richard Bach), One, Jonathan Livingston Seagull, Bridge Across Forever, Illusions போன்ற பல பிரபல புத்தகங்களின் எழுத்தாளர். அவர் (Richard Bach) எழுதிய One என்ற இந்த புத்தகத்தை நண்பனொருவன் பரிந்துரைத்தான். படித்து முடித்ததும் நண்பனைவிட, இந்த புத்தகத்தை மிக நெருக்கமாக உணர ஆரம்பித்துவிட்டேன். இந்த புத்தகத்தை சிபாரிசு செய்ததாலேயே அவன் இன்னும் நெருங்கிப் போனது தனி நிகழ்வு.

கதை சொல்லும் பாங்கு, நிகழ்வுகளின் கட்டமைப்பு மற்றும் சொல்ல வரும் விஷயத்தின் நேர்த்தி இவையனைத்துமே தனித் தனியாக சிலாகிக்க வேண்டிய விஷயங்கள், ஆனால் என்னை மிகவும் கவர்ந்த விஷயம் இந்தப் புத்தகத்தின் அடிநாதமாக விளங்கும் சில கருத்துக்கள் மற்றும் கேள்விகள்தான்.

ஒவ்வொரு யோசனையும், ஒவ்வொரு தீர்மானமும் நம்மைப் போன்ற ஒரு பிரதியை உண்டாக்கி விடுகிறது, இந்த பிரபஞ்சத்தில்.

சிந்திக்கவே எவ்வளவு சுவாரசியமான விஷயம் இது, ஒரு கல்லூரியை உதாரணமாக எடுத்துக் கொண்டீர்களானால், படிப்பு முடிந்ததும் ஒவ்வொருவரும் ஒரு முடிவு எடுப்பார்கள் அதன் படி அவர்கள் வாழ்க்கைப் பாதையே மாறும். இவர்கள் அனைவரும் உங்கள் பிரதிகள் என்று வைத்துக் கொண்டீர்களானால் உங்கள் வாழ்வும் ஒவ்வொரு முடிவுகளால் எப்படியெல்லாம் மாறியிருக்கும் என்று ஊகிக்க உதவும். இதையே நம் வாழ்வில் முன் சென்று பார்ப்பதற்கும் உபயோகித்துக் கொள்ளலாம்.

ஏனென்றால் இன்று நேரும் மிகச்சிறிய மாற்றம், நம்மை மிக வித்தியாசமான நாளையில் கொண்டுசேர்த்து விடுகிறது. (A tiny change today brings us to a dramatically different tomorrow)

இந்த புத்தகத்தில், நமது யோசனை, சிந்தனை, தீர்மானங்களை சேகரிக்க, அல்லது அவற்றின் வழி சென்று பார்க்க வகை செய்யும் சக்தி வாய்ந்த ஒரு தொழில்நுட்பத்தை பற்றி அதிக குழப்பமின்றி பேசுவார் பாக், கால இயந்திரத்தை இன்று நடைமுறையில் இருக்கும் மிகச் சாதாரணமான போக்குவரத்து சாதனம் போலவே பாவித்துக் கொள்கிறார். இதுவே நம்மை அதிக எதிர்க்கேள்விகளின்றி கதையின் போக்கில் செல்ல துணை புரிகிறது. ஆசிரியர் நம்மைப் பார்த்துக் கேட்கும் ஆதாரக் கேள்வியை புரிந்துகொண்டு, நம்மை நாமே அதைக் கேட்டுக் கொள்ள வைக்கும் பணியில் வெற்றியும் பெற்று விடுகிறது ஆசிரியரின் இந்த படைப்பான "One".

நீங்களே படித்துணர வேண்டிய விஷயங்கள்தான் இந்தப் புத்தகமெங்கும் நிறைந்து இருப்பதால், இந்த புத்தகத்தைப் பற்றி நான் வேறு எதுவும் கூறப் போவதில்லை. இந்த புத்தகம் எழுப்பிய மிக சுவாரசியமான கேள்விகள் சிலவற்றை மட்டும் கேட்டு வைக்கிறேன்.

1) இப்போது இருக்கும் நீங்கள் உங்களை உங்கள் சிறு வயதிலே சந்தித்தால் என்ன கூறுவீர்கள்? உங்களின் எந்த அனுபவத்தை பகிர்ந்து கொள்வீர்கள்?

எ.கா : பத்தாவதில் மார்க் கம்மி என்று இப்படி அழுது கொண்டிருக்கிறாயே... இந்த மார்க் உனக்கு உபயோகமாகப் போவதேயில்லை ஏனென்றால் நீதான் பனிரெண்டாவதில் ஸ்டேட் பர்ஸ்ட். அழாமல் அடுத்த வேலையைக் கவனி. (அல்லது) சிறுசிறு சண்டைகளால் அவனுடன் பேசாமல் இருக்கிறாயே, கல்லூரி முடியும் இந்த தறுவாயிலாவது அவனோடு பேசிவிடு, இந்த வாய்ப்பை விட்டால் அவனை நீ சந்திக்கவே போவதில்லை. குறைந்த பட்சம் உன் 40 வயது வரை

2) அப்புறம், மேலும் ஒரு சூழல். இப்போதுள்ள உங்களை, உங்களின் 60 வயது பிரதி சந்தித்தால் என்ன கேட்டுக் கொள்வீர்கள்?

எ.கா : சோழிங்கநல்லூர் பக்கத்தில் வாங்கிய மனை விலையேறியதா?
(அல்லது)
ஓயாமல் குடியும் கும்மாளமாக இருக்கிறேனே, நான் 60 வயது வரை உயிரோடு இருந்தேனா என்ன?

அதற்கு அவர்கள் பதில் என்னவாக இருந்திருக்கும்? அவர்கள் பதிலால் உங்கள் வாழ்க்கைப் பாதை மாறியிருக்குமா?

யோசியுங்கள், ஏனென்றால் நம் வாழ்வின் கடைசிக் கேள்வி இப்படியிருக்கலாம்.

இப்போது உள்ள நானாக மாறுவதற்கு விலையாக என் வாழ்க்கையையே தந்திருக்கிறேன். நான் தகுந்த விலையைத்தான் கொடுத்திருக்கிறேனா ? (I gave my life to become the person I am right now. Was it worth it?

இந்தக் கேள்விகளை சில வலைப்பதிவர்களிடம் கேட்ட போது...

அனிதா
1) அந்தச் சிறுமியிடம், பெற்றோர்களோடும், தங்கையோடும் இன்னும் அதிக நேரம், அதிக மகிழ்ச்சியாக செலவழிக்கச் சொல்வேன், (பிற்காலத்தில் அவ்வளவாக கிடைப்பதில்லை அந்தப் பொழுதுகள்). பள்ளிக்கு செல்வதே இன்பம் என்பதை எடுத்துக் கூறுவேன், விளையாடுவதற்கென்றே நேரம் ஒதுக்கப் பட்டிருக்கிறதே!! (சிறு வயது அனிதா, அலுவலகம் செல்பவர்களை பொறாமையுடன் பார்ப்பாள் :-))
2) சூப்பர் சீனியர் அனிதா நான் கேட்பதற்கு முன்னமே, வாழ்க்கை விலைமதிப்பற்றது எனவே சின்னச்சின்ன விஷயங்களுக்காகவெல்லாம் வருத்தப்பட்டு அழுது கொண்டிராதே என்பாளாயிருக்கும். மேலும், இப்போது நீ வருந்தும் விஷயங்கள் எல்லாம் பைசா பிரயோஜனமில்லாதவை... ஏனென்றால் நானும் என் பிரிய கணவனும் பண்ணைவீட்டில், மகன், மகள், பேரன் பேத்திகளுடன் வாழ்க்கையை உல்லாசமாக க(ழி)ளித்திக் கொண்டிருக்கிறோம் ;-)

தடாலடி கௌதம்
1) இப்ப இருக்க மாதிரியே சிகரெட், தண்ணி இரண்டையும் இனிமேலும் தொடாதடா!
2) ஆசைப்பட்டதை எல்லாம் அடைந்து விட்டாயா?

வெட்டிப்பயல்
1) +2ல எண்ட்ரன்ஸ் மார்க் வந்தது என் பிறந்த நாளன்று... மார்க் குறைஞ்சிடுச்சினு ரொம்ப வருத்தப்பட்டேன். அந்த பாலாஜிய பாத்திருந்தேன்னா கவலைப்படாம ஜாலியா இரு... உனக்கு நல்ல கம்பெனில வேலை கிடைச்சு நீ நல்ல நிலைமைல இருப்பனு சொல்லியிருப்பேன் :-)
2) அந்த பாலாஜிய பார்த்தேன்னா கேக்கறது இதுவாத்தான் இருக்கும். ஒழுங்கா ஏதாவது புண்ணியம் செஞ்சியா? இல்லனா சீக்கிரம் செய். நீ நாளைக்கே செத்தாலும் செத்துடுவனு சொல்லுவேன் ;)

தேவ்
1) எப்பிடி கஜோலை தீவிரமா லவ் பண்ணி அஜய் தேவ்கன் கூட போட்டி போட முடியாமல் என் முதல் காதலை மொழி தெரியாமல் தொலைத்தேன்னு சொல்லுவேன்.. காதல் அப்டின்றது ஒரு மாயவலை கல்யாணம் அது அதை விட பெரிய மந்திரக்கலைன்னு எடுத்து சொல்லுவேன்.
2) ஆமா என்ன என்னமோ பெரிய பீட்டர் விட்டுகிட்டு திரிஞ்ச இப்போ எல்லாதையும் சாதிச்சிட்டியா ? என்ன ஆச்சுன்னு கேட்பேன்? White House விலை பேசி அதுக்கு சிவப்பு பெயின்ட் அடிக்க போறேன்னு சொன்னியே செஞ்சியான்னு கேட்பேன்.

சோம்பேறி பையன்
1) நன்றாக படிக்க வேண்டும் என சொல்வேன்.
2) உங்கள் திருமண வாழ்க்கை எப்படியிருந்தது என கேட்பேன்.

நான் இவர்களிடம் கேட்க மறந்த கேள்வி...

உங்களுக்கு கிடைக்கும் பதிலால் உங்கள் வாழ்க்கைப் பாதை மாறியிருக்குமா?
நீங்கள் என்ன நினைக்கிறீர்கள் உங்களுடைய பதில்களையும் பின்னூட்டமிடலாமே...

சென்ற வாரம் தமிழோவியத்தில் வெளிவந்த கட்டுரை இது!